قفّى العمر واقفيت عن كل قضقاض
والحمد لله عايش اليوم مرتاح
وابعدت عن نمّام و عن كل غضغاض
الي هروجه ناقصه والفعل طاح
وصدّيت عن مقفين والرب عيّاض
المعطي الرزاق اضعاف لرباح
وجنبت انا وصديت عن كل مغتاض
خايب وضيع النفس للخير شحاح
واسرجت خيلي نافرٍ صوب مقياض
راجي خصوب الزرع والطير صداح
اوصيك لا شديت يا خيّ ترتاض
تاخذ علوم الدار وتكون لمّاح
واحذر تصاحب حاقر الهرج نقّاض
له فالمجادل و المدح دوم مدّاح
واحذر ذميم القول له شين الالفاظ
خايب جليسه ومجلسه دوم فضّاح
وخلك قوي الباس ان سرت مضاض
ما تنكسر لو هنت والشر ينزاح
وخلك حكيم الراي لو كنت وقّاض
شورك يحل العقد للخير نطّاح
وان صرت بين اثنين يا صاحبي راض
اعدل وتم الصلح وتكون نصّاح
عل السحاب المقفي اليوم فياض
يسقي مرابي تنبت الزهر مسراح
وعل الخصوب تفج وتكون فضفاض
وتنضج ثمار الود في عذق ردّاح
خطيت شعري بدمعةٍ حبرها فاض
وشديت ع الترحال واليوم مرواح
